Ymateb Gwasanaeth Ieuenctid Caerdydd i ddigartrefedd pobl ifanc yw sicrhau bod pobl ifanc a allai fod yn dangos arwyddion cynnar o ddigartrefedd pobl ifanc yn cael eu nodi drwy nifer o wahanol feini prawf, a chynigir ymateb ataliol iddynt.  Cyflawnir hyn drwy ddefnyddio nifer o wahanol ffynonellau data, gan gynnwys y PAB a'r offeryn sgrinio Uwchffrwd. Bydd yr offer hyn yn nodi'r bobl ifanc hynny a allai elwa o'r cymorth sydd ar gael. Mae'r cymorth yn amrywio o: gyfryngu teuluol, cymorth un-i-un, gwaith grŵp a sesiynau ymwybyddiaeth digartrefedd anffurfiol.

Yn ogystal, rhoddir pwysigrwydd ar sicrhau yr ymgynghorir â phobl ifanc â phrofiadau byw ar unrhyw ddatblygiadau neu ddarpariaethau a gynigir i bobl ifanc. Rôl Gwasanaeth Ieuenctid Caerdydd yw sicrhau bod y datblygiadau a'r darpariaethau hyn yn chwarae rhan ganolog wrth ategu'r agenda ddigartrefedd o fewn y gwasanaeth. 

At hynny, bydd datblygu grŵp gweithredol ar gyfer gweithwyr proffesiynol sy'n gweithio gyda phobl ifanc sy'n profi digartrefedd yn cael ei sefydlu. Y diben yw sicrhau bod ymateb cadarn yn cael ei gynnig ar draws y ddinas ynghyd â llwybr clir a hygyrch i bobl ifanc ddigartref. Os hoffech ymuno â'r grŵp hwn, cysylltwch â ni drwy'r manylion isod.

Ymagwedd gwasanaeth cyfan

• Darparu pecyn gweithgareddau Agor Drysau i bobl ifanc 11-18 oed, ymwybyddiaeth a chyflwyniad i ddigartrefedd pobl ifanc.
• Darparu'r Pecyn Trac Cywir i gael gwybodaeth am dai a digartrefedd.
• Hyfforddiant staff sy'n ymwneud â digartrefedd pobl ifanc i ddeall sut i adnabod yr arwyddion, cynnig y wybodaeth a'r gefnogaeth gywir, yn glir o'r llwybr digartrefedd a hawliau pobl ifanc i gael gafael ar dai a chymorth tai priodol.
• Casglu a choladu data fel y bo'n briodol, er mwyn nodi'n gynnar y bobl ifanc hynny a allai fod yn arddangos nodweddion a allai arwain at ddigartrefedd pobl ifanc (h.y. syrffio soffa, chwalfa/gwrthdaro teuluol, presenoldeb gwael yn yr ysgol, trais domestig, gweithgareddau troseddol, ynysu, profedigaeth, LHDTC+ ac ati)
• Gweithio gyda phobl ifanc sydd â phrofiadau byw i gefnogi'r gwaith o ddatblygu a darparu ymwybyddiaeth o ddigartrefedd pobl ifanc ym mhob darpariaeth a theilwra ymyrraeth gyfredol er mwyn hyrwyddo lleisiau pobl ifanc.
• Darparu sesiynau ar reoli iechyd meddwl a lles da er mwyn datblygu'r gallu i "ymdopi" â heriau a allai arwain at ddigartrefedd pobl ifanc (ymyriadau sy'n seiliedig ar gryfderau ac ymyriadau sy'n seiliedig ar ganolfannau)
• Cefnogi pobl ifanc i gael Gwaith, Addysg, Hyfforddiant neu i Wirfoddoli i leihau'r risg o ymddieithrio a'r risg o fod yn ddigartref.

Amdanom ni

Y Tîm Cynnwys Actif (TCA) yw tîm cyfranogiad ac ymgysylltu â phlant a phobl ifanc Gwasanaeth Ieuenctid Caerdydd. Y nod yw sicrhau ein bod yn estyn allan at gynifer o bobl ifanc â phosibl ac yn rhoi mwy o gyfleoedd i'w lleisiau gael eu clywed, yn ogystal â chynnwys pobl ifanc o ran llywodraethiant gwasanaethau ieuenctid ehangach a sicrhau bod pobl ifanc yn ymwybodol o newidiadau a gweithredoedd a wneir yn sgil eu mewnbwn. Mae gan y tîm bwyslais arbennig ar Erthygl 12: 

'Mae gan blant a phobl ifanc yr hawl ddynol i gael barn ac i'r barnau hyn fod o bwys. Mae’n nodi y dylai barn plant a phobl ifanc gael ei hystyried pan fydd pobl yn gwneud penderfyniadau ar yr hyn sy’n effeithio arnynt ac na ddylid ei diystyru fel mater o drefn ar sail oedran. Mae’n dweud hefyd y dylai plant a phobl ifanc gael y wybodaeth sydd ei hangen arnynt i wneud penderfyniadau da.’ 

Yn ychwanegol at hyn, byddwn hefyd yn cadw at Erthygl 13 ac yn sicrhau ein bod ni fel gweithwyr ieuenctid yn rhoi'r wybodaeth, y cymorth a'r Arweiniad diweddaraf a phriodol i'r holl bobl ifanc yr ydym yn dod ar eu traws i gynyddu eu mynediad at wybodaeth a chymorth i wneud dewisiadau/penderfyniadau ar sail gwybodaeth ynghylch y pethau sy'n bwysig iddynt. 

Erthygl 13: "Bydd gan y plentyn yr hawl i ryddid mynegiant; bydd yr hawl hon yn cynnwys rhyddid i geisio, derbyn a rhannu gwybodaeth a syniadau o bob math, waeth beth fo'r ffiniau, naill ai ar lafar, yn ysgrifenedig neu mewn print, ar ffurf celfyddyd, neu drwy unrhyw gyfryngau eraill o ddewis y plentyn" 

Er mwyn ceisio cyflawni hyn, mae'r TCA yn cynnal Projectau ac yn mabwysiadu'r dulliau a ddangosir isod: 

Rhaglen Ifanc 

· Comisiynwyr Ifanc - Mae tua 55 o bobl ifanc wedi derbyn hyfforddiant ac wedi helpu gyda'r broses o gomisiynu gwerth dros 65 miliwn o bunnau o wasanaethau. 

· Cyfwelwyr Ifanc - Mae dros 100 o bobl ifanc wedi derbyn hyfforddiant ac wedi cymryd rhan mewn dros 810 o gyfweliadau gyda Chyngor Caerdydd (adrannau amrywiol), Prifysgol De Cymru, Bwrdd Iechyd Caerdydd a’r Fro a llawer o rai eraill gan gynnwys sefydliadau'r trydydd sector. 

· Arolygwyr Ifanc - Mae dros 40 o bobl ifanc wedi cael eu hyfforddi a’u harolygu. 

· Ymchwilwyr Ifanc - Bu 12 o bobl ifanc yn cymryd rhan mewn ymchwil ynghylch y cysylltiad rhwng tlodi a chyrhaeddiad addysgol. 

· Arweinwyr Ifanc – yn cael ei ddatblygu'n fewnol gyda gwasanaethau ieuenctid ar hyn o bryd. 

‘Dw i'n Dweud 

Rhaglen addysgol, a gyflwynir mewn ysgolion cynradd ac uwchradd, sy'n ymdrin â'r pynciau canlynol: 

· Hawliau a Chyfranogiad Plant 

· Llais y Disgybl (e.e. cynghorau ysgol, trafodaethau, cyfweliadau â staff, gwerthuso staff, gwerthuso’r ysgol) 

· Democratiaeth – Cyfranogiad Ieuenctid 

· Democratiaeth – Prosesau Democrataidd y Deyrnas Gyfunol 

Yn ogystal, at hyn rydym ar hyn o bryd yn gweithio o fewn y gwasanaethau ieuenctid ehangach gyda phobl ifanc yn cyflwyno cyfranogiad ac yn creu cyfleoedd pellach i bobl ifanc fod yn aelodau gweithgar o'r gymuned. Ein nod hefyd yw creu cyfleoedd i grwpiau ehangach o bobl ifanc fod yn rhan o benderfyniadau a newidiadau strategol. 

Safonau Cyfranogiad 

Mae TCA yn cefnogi gwasanaethau ieuenctid ehangach i ymgymryd â'r marc barcud ar gyfer safonau cyfranogiad: 

· Cymorth, arweiniad a monitro gan staff 

· Cydgysylltu arolygiadau ieuenctid 

Hyfforddiant 

Mae TCA yn darparu hyfforddiant ar hyn o bryd o fewn y gwasanaethau ieuenctid: 

· Hawliau a chyfranogiad plant – hyfforddi'r hyfforddwr ‘Dw i’n Dweud 

· Hyfforddi'r hyfforddwr ym mhob agwedd ar y Rhaglen Ifanc – Darperir o fewn ein gwasanaeth ac i bartneriaid. 

· Hyfforddiant pwrpasol a nodwyd gan weithwyr proffesiynol a phobl ifanc – wedi'i gynllunio a'i gyflwyno i gyd-fynd â bylchau dysgwyr o ran cyfranogiad ac ymgysylltiad. 

· Hyfforddiant ar ddemocratiaeth a grwpiau cymunedol – datblygu ar gyfer staff a phobl ifanc. 

Strategaethau 

· Gwaith allgymorth. 

· Partneriaeth fewnol a chydweithio. 

· Gwaith partneriaeth allanol. 

· Addysg Anffurfiol. 

· Ymagwedd sy’n canolbwyntio ar yr unigolyn 

· Projectau / gweithdai – Cyfleoedd ar gyfer datblygiadau a sgiliau mewn cymunedau. 

· Ymgyngoriadau – sgyrsiau ystyrlon gyda phobl ifanc. 

· Hyfforddiant – Gweithwyr proffesiynol a phobl ifanc 

· Cydweithio gyda Chyngor Ieuenctid Caerdydd a grwpiau cymunedol lleol.

Os hoffech wybod mwy am beth rydyn ni’n ei gynnig, neu os ydych naill ai'n weithiwr proffesiynol neu'n berson ifanc sydd eisiau cymryd rhan, mae ein manylion cyswllt isod.

 

Amdanom ni

Rydym yn cynnig cymorth un-i-un i bobl ifanc 16-25 oed nad ydynt mewn cyflogaeth, addysg na hyfforddiant. Mewn partneriaeth â Gyrfa Cymru, mae'r Prosiect Mentoriaid Ieuenctid Ôl-16 yn brosiect hirsefydlog a llwyddiannus a ariennir gan Teuluoedd yn Gyntaf sy'n cael ei redeg gan Wasanaeth Ieuenctid Cyngor Caerdydd. Nod y tîm yw targedu pobl ifanc ddi-waith ac economaidd anweithgar, 16 + oed, o bob rhan o Gaerdydd. Maent yn cynnig dull wedi'i deilwra sy'n canolbwyntio ar yr unigolyn, sy'n ceisio helpu i bennu a dileu rhwystrau personol.  Mae hyn yn galluogi pobl ifanc i barhau i ymgysylltu'n barhaus ag addysg, hyfforddiant neu'r farchnad lafur gyflogedig. Mae ein tîm yn weithwyr Ieuenctid a Chymunedol cymwys, sy'n gweithio'n agos gyda phobl ifanc ac asiantaethau partner. Rydym yn cynnig gwasanaeth atgyfeirio am ddim i oresgyn y rhwystrau y gall pobl ifanc eu hwynebu, a'u cefnogi i gael mynediad at addysg, cyflogaeth neu hyfforddiant ac aros mewn addysg, cyflogaeth neu hyfforddiant.

'Mae’r broses Mentora Ieuenctid wedi helpu i ddatblygu fy hyder yn aruthrol drwy ymgymryd â heriau newydd fel dysgu gyrru, gwneud cais i fynd i’r coleg gyda'r uchelgais o fod yn nyrs. Rwyf wedi bod yn rhan o'r holl benderfyniadau ac mae nhw hefyd wedi fy helpu i wneud penderfyniadau, ac wedi bod yn agored ac yn onest. (Person ifanc)

 

 

Dull Mentoriaid Ieuenctid

 Mae'r broses Mentoriaid Ieuenctid wedi’i seilio ar berthnasoedd sy'n seiliedig ar ymddiriedaeth a pharch at ei gilydd, a ffurfir drwy ymgysylltu gwirfoddol. Mae pob mentor yn mabwysiadu dull anfeirniadol a thrylwyr sy'n annog pobl ifanc i gyfrannu at eu nodau a'u dyheadau personol a gwneud penderfyniadau allweddol arnynt.  Mae ein dull sy'n canolbwyntio ar yr unigolyn yn caniatáu i unigolion sy'n barod ar gyfer addysg, hyfforddiant neu gyflogaeth, ynghyd â'r rhai sydd bellaf i ffwrdd, gael y cymorth priodol.

Sut y gall Mentoriaid Ôl-16 helpu

Nod Mentoriaid Ieuenctid Ôl-16 yw gwrando, cefnogi a sefydlu cynlluniau gweithredu personol a fydd yn galluogi pobl ifanc i gyflawni eu huchelgeisiau addysgol, hyfforddiant neu yrfaol.

Gall Mentor Ieuenctid helpu pobl ifanc i:

• Sicrhau mwy o eglurder a dealltwriaeth o addysg cyflogaeth neu hyfforddiant a'r cyfleoedd sydd ar gael iddynt.
• Nodi sgiliau a galluoedd unigol.
• Dileu'r rhwystrau i unrhyw nodau a dyheadau addysg cyflogaeth neu hyfforddiant yn y dyfodol.
• Creu atebion personol i broblemau a nodwyd, gyda chymorth.
• Gwneud eich dewisiadau addysg, cyflogaeth neu hyfforddiant.
• Nodi cyrsiau addysg neu hyfforddiant addas.
• Cael mynediad at Gwricwla Ôl-16 / sesiynau grŵp pwrpasol yn seiliedig ar anghenion a nodwyd.
• Cymryd rhan mewn gweithgareddau i wella sgiliau neu weithio tuag at achrediad.
• Cysylltu â Gwasanaethau Ieuenctid ehangach.
• Cael gafael ar y gwasanaethau angenrheidiol.
• Dod o hyd i gyfleoedd priodol.
• Creu a thrawsnewid cynlluniau'n weithredoedd ac, yn bwysicaf oll, llwyddiant.

Bydd unrhyw berson ifanc sy'n cael ei atgyfeirio a'i dderbyn yn llwyddiannus i'r Gwasanaeth Ôl-16 yn cael Mentor Ieuenctid Ôl-16 cymwys a phrofiadol, a bydd yn cyfarfod ag ef yn rheolaidd ar sail un-i-un. 

'Roedd e (Mentora Ieuenctid)... yn ddefnyddiol iawn i siarad am fy mhroblemau.  Cefais lawer o help i gael arian budd-daliadau.  Rwy'n teimlo'n fwy hyderus ac rwy'n meddwl am fy nyfodol mewn ffordd fwy cadarnhaol' (Person Ifanc)

 Os hoffech gysylltu â'n tîm, gallwch ddod o hyd i'n cyfryngau cymdeithasol, e-bost a'n rhif cyswllt isod. 

 

Mae Gwasanaeth Ieuenctid Caerdydd yn cynnig mynediad agored tair noson yr wythnos i’r canolfannau ieuenctid, 44 wythnos o'r flwyddyn, ar draws y ddinas i pobl ifanc rhwn 11 a 25 mlwydd oed.  Mae Canolfannau Ieuenctid yn fan ble gall pobl ifanc gymryd rhan mewn amrywiaeth o weithgareddau mewn amgylchedd diogel. Bydd gan bobl ifanc fynediad i'n tîm o Weithwyr Ieuenctid a fydd yn cefnogi datblygiad cymdeithasol, addysgol ac emosiynol pobl ifanc. 

Mae cyfleoedd dysgu anffurfiol, gwybodaeth ac arweiniad ar gael i bobl ifanc ynghylch ystod eang o faterion. Mae hyn yn galluogi pobl ifanc i wneud penderfyniadau gwybodus am ddewisiadau bywyd a'r cyfleoedd sydd ar gael iddynt. 

Edrychwch ar fwy o wybodaeth am bob Canolfan Ieuenctid drwy glicio ar y dolenni.